AF222a: 59r
Müseddes‑i Cinānī
hezec: mefʿūlü ‑ mefāʿīlü ‑ mefāʿīlü ‑ feʿūlün
I
Ḫalquñ ne ʿaceb ḥikmet olur ʿaqd‑ile ḥalli
Bir ḥāle münāsib görilür cümle maḥalli
Eyler kimisi fikr‑i teraqqī vü teʿallī
Gelmiş kimine ʿālem‑i süflīde tesellī
Ḫallāq‑i cihān ʿāleme qılduqça tecellī
Her şeyʾi birer ḥālle qılmış mütesellī
II
Olmış kimisi cümle cihān milkine sulṭān
Başında ġam‑i ṭanṭana‑i şevket‑i dīvān
Ammā kiminüñ qudreti yoq müflis‑i devrān
Her birisi yine ḥālince ḥurrem [!] ü ḫandān
Ḫallāq‑i cihān ʿāleme qılduqça tecellī
Her şeyʾi birer ḥālle qılmış mütesellī
III
Giymiş kimisi cāme‑i zer‑beft ü zer‑endūd
Peşmīne geyüb kimi gezer faqrla merdūd
Ḥirmān‑iledür kimi kimi vāṣıl‑i maqṣūd
Ḥikmet bu ki her biri yine ḥāline ḥoşnūd [!]
Ḫallāq‑i cihān ʿāleme qılduqça tecellī
Her şeyʾi birer ḥālle qılmış mütesellī
IV
Olmış kimisi mīr ü kimi şaḥne vü qāżī
Ġavġāsı olur derd ü belāy‑i muqtenāżī [!]
Ṣorsañ yine aḥvālini müstaqbel vü māżī
Her birisi ḥālinden olur şākir ü rāżī
Ḫallāq‑i cihān ʿāleme qılduqça tecellī
Her şeyʾi birer ḥālle qılmış mütesellī
Left margin:
Sirke içün māye ve çoq şarābı ḫabīs̱ī sirkeye istiḥlāl eylemek murād olındükde bir miqdār kepegi alub // baġlayasın bez içine baʿdehū şarāb içine sarqıdasın on beş yigirmi günde ne‑miqdār çoq şarāba qonılsa // şarāb sirkeye döner ġāfil olmalu degüldür